29.10.2024

Канферэнцыя для педагогаў раёна

ў межах  сумеснага праекта “Узыходжанне”

Нясвіжскай цэнтральнай раённай бібліятэкі імя Паўлюка Пранузы і Слуцкай епархіі Беларускай Праваслаўнай Царквы “Выхаванне верай, або

Значэнне храма для маладога пакалення беларусаў.

Парады настаўнікам”

(cумесна са святарамі Нясвіжскага благачыння, педагогамі ўстаноў адукацыі раёна, благачыннай Свята-Елісавецінскага манастыра манахіняй Сусаннай,  прадстаўнікамі духоўна-асветніцкага цэнтра “Каўчэг”).

     У рамках сумеснага праекта “Узыходжанне” Нясвіжскай цэнтральнай раённай бібліятэкі імя Паўлюка Пранузы і Слуцкай епархіі Беларускай Праваслаўнай Царквы прайшла канферэнцыя “Выхаванне верай, або Значэнне храма для маладога пакалення беларусаў. Парады настаўнікам”.

    У канферэнц-зале бібліятэкі сабраліся педагогі раёна і  бібліятэкары. З праграмай канферэнцыі і планамі на наступны год прысутных пазнаёміла кіраўнік праекта В. Шчарбакова. Аб значэнні веры для кожнага чалавека паразважаў благачынны Нясвіжскага благачыння, настаяцель храма Узнясення Гасподня г. Нясвіжа протаіерэй А. Данчанка.

     Абмеркаванне пытанняў, акрэсленых у праграме канферэнцыі, яе ўдзельнікі прадоўжылі ўжо ў Мінску, а дакладней, у адным з залаў для правядзення духоўных гутарак Свята-Елісавецінскага жаночага манастыра.

   Неардынарнай падзеяй для несвіжан стала магчымасць пачуць думку на гэтыя пытанні духоўніка Праваслаўнага Сястрыцтва ў імя прападобнамучаніцы Вялікай Княгігі Елісаветы і Свята-Елісавецінскага манастыра    протаіерэя Андрэя Лемяшонка. Айцец Андрэй лічыць, што выхоўваць у веры патрэбна не толькі вучняў, але і іх бацькоў. Менавіта тады ў нас з’явіцца магчымасць хоць якім чынам супрацьстаяць спакусам гэтага свету. І абавязкова выхоўваць дзяцей у любові.

    Гэтую думку падтрымала дырэктар ПУА “Сярэдняя школа “Іхвіс” пры манастыры манахіня Вольга (Антановіч).  Матушка Вольга расказала аб супрацоўніцтве ПУА “Сярэдняя школа “Іхвіс” з Свята-Елісавецінскім манастыром у межах Праграмы супрацоўніцтва Міністэрства адукацыі Рэспублікі Беларусь і Беларускай Праваслаўнай Царквы.

     Экскурсавод Уладзімір Чубакоў пазнаёміў удзельнікаў канферэнцыі з гісторыяй абіцелі, закрануў некаторыя напрамкі дзейнасці духоўна-асветніцкага цэнтра “Каўчэг”, а таксама падзяліўся і сваімі думкамі аб значэнні веры і храма для маладога пакалення беларусаў.

   Несвіжане наведалі і магілку святой блажэннай Валянціны Мінскай, звярнуўшыся з малітвай да беларускай святой.

                   Несвижская центральная районная библиотека им.П.Пронузо