27.10.2023

Паломніцкая паездка ў храм Касмы і Даміяна аг. Сноў

“Святыні Нясвіжчыны”

     Наведвальнікі клуба “Ноеў каўчэг” Нясвіжскай цэнтральнай раённай бібліятэкі ім. П.Пранузы і ўдзельнікі праекта “Парады з вуснаў несвіжан” бібліятэкі, раённай газеты “Нясвіжскія навіны” і праграмы радыёвяшчання “Раніца Нясвіжчыны”, СШ №4 горада Нясвіжа  пабывалі ў храме Касмы і Даміяна аграгарадка Сноў. Рабят сустрэла выкладчык нядзельнай школы, што дзейнічае пры храме,  Таццяна Калеснік. Таццяна Пятроўна расказала аб гісторыі храма, паказала іконы, якія  асабліва ўшаноўваюцца вернікамі. Сярод іх — Смаленская ікона Божай Маці. Ёсць сведчанні, што па малітве  да гэтай іконы ў бяздзетнай сямейнай пары нарадзілася чаканае дзіця, а яшчэ, па словах матушкі Таццяны, гэтай іконе асабліва моляцца маладыя дзяўчаты, каб Божая Маці паслала ім добрага спадарожніка ў жыцці.

     Расказала матушка і аб іконах і жыціі  Гаўрыіла Беластоцкага і Манефы Гомельскай, якія змяшчаюць часціцы мошчаў гэтых святых.

     Госці  даведаліся, што храм Касмы і Даміяна быў пабудаваны ў 1836 годзе на месцы капліцы Пятра і Паўла, якая згарэла. Будынак таксама быў асвечаны ў імя Пятра і Паўла, а ў 1893 годзе, пасля рэканструкцыі, царкву пераасвяцілі ў імя святых Касмы і Даміяна. У храме знаходзіцца чатырох’ярусны іканастас 18 стагоддзя, зроблены ў Віленскім праваслаўным манастыры Святога Духа і з пабудовай царквы перададзены манахамі ў падарунак.

Нясвіжская цэнтральная раённая бібліятэка ім. П.Пранузы