22.05.2026

Паломніцтва ў Свята-Елісавецінскі манастыр,

Свята-Духаў кафедральны сабор, на магілку Валянціны Мінскай

“Святыні Беларусі”

      У рамках сумеснага праекта “Узыходжанне” Нясвіжскай цэнтральнай раённай бібліятэкі імя Паўлюка Пранузы і Слуцкай епархіі Беларускай Праваслаўнай Царквы адбылося чарговае штогадовае паломніцтва “Святыні Беларусі”. Свае благаславенні юным падарожнікам даў благачынны Нясвіжскага благачыння, настаяцель храма Узнсясення Гасподня протаіерэй Аляксандр Данчанка, нагадаўшы пра тое, што ў святых мясцінах нашай Радзімы была яўлена асаблівая міласць Божая. На гэты раз юныя ўдзельнікі праекта, старшакласнікі  СШ № 1 і СШ №4, а таксама Карцэвіцкай сярэдняй школы  адправіліся ў Свята-Елісавецінскі манастыр. Рабят сустрэла манахіня Ісіхія (Аляксеева) і пазнаёміла з гісторыяй абіцелі. Паломніцтва прыйшлося на свята Мікалая Цудатворца. З гэтай нагоды ў манастыры праходзіў хрэсны ход у гонар святога, у якім рабяты таксама паўдзельнічалі.

Наступным прыемным момантам стала прэзентацыя песеннай творчасці насельніцы манастыра матушкі Феадулы, якая выканала для рабят некалькі калыханах і духоўных песень пад гітару.

Чакаў юнакоў і дзяўчат і салодкі пачастунак. Матушка Ісіхія прапанавала гарбату з манастырскай выпечкай.

Быў час і для малітвы, магчымасць запаліць свечкі, папрасіць аб заступніцтве ў святой ахоўніцы манастыра.

    Наступным момантам паломніцтва стала наведванне Свята-Духава кафедральнага сабора, дзе знаходзяцца мошчы святой праведнай Сафіі, княгіні Слуцкай. Аб гісторыі сабора расказала экскурсавод Марыя Нецвятаева. Марыя Валянцінаўна прапанавала яшчэ і экскурсію па старым Мінску, расказала аб месцах знаходжання старажытных, але, на жаль, разбураных храмаў.

     Завяршаючы сваё падарожжа, удзельнікі праекта “Узыходжанне” пабывалі на магілцы святой блажэннай Валянціны Мінскай і папрасілі ў яе дапамогі для сябе і сваіх блізкіх.

       У арганізацыі паломніцтва, акрамя супрацоўнікаў бібліятэкі, прынялі ўдзел настаўнікі вышэйназваных навучальных устаноў Наталля Герасімовіч і Зоя Маляр, а таксама начальнік упраўлення па адукацыі і спорце Нясвіжскага райвыканкама Святлана Шатрун.

      Усе ўдзельнікі паломніцтва ўдзячны дырэктару Нясвіжскай цэнтральнай раённай бібліятэкі імя Паўлюка Пранузы Аксане Рыжыкавай і вадзіцелю гэтай установы Ігару Захарэвічу, якія забяспечылі паломніцкую групу транспартам.

      Валянціна Шчарбакова,

кіраўнік праекта “Узыходжанне”

Несвижская центральная районная библиотека им. П.Пронузо