15.11.2024

творчая сустрэча “Грані жыцця”

 да 90-годдзя паэта Барыса Вятлугіна

ў рамках праекта “Парады з вуснаў несвіжан”

У Нясвіжскай цэнтральнай раённай бібліятэцы імя Паўлюка Пранузы  ў рамках сумеснага праекта “Парады з вуснаў несвіжан” адбылася творчая сустрэча “Грані жыцця” з нагоды  90-годдзя  паэта-земляка  Барыса Вятлугіна.

Грані жыцця гэтага чалавека  аздоблены мудрасцю слоў, учынкаў, падарожнымі запісамі ў вершах і прозе, сустрэчамі і развітаннямі, няспыннай працай  рук, розуму і сэрца.  Ён нарадзіўся ў Грузіі, жыў у Расіі, на Украіне. Барыс Мікалаевіч — прафесійны ваенны, справе абароны Радзімы аддаў 29 гадоў свайго жыцця. У 1956  годзе скончыў ваеннае вучылішча ў Ніжнім Ноўгарадзе. Служыў у Расіі, Чэхаславакіі, Эстоніі. Але галоўнай краінай па значнасці стала для яго Беларусь, як і сярод гарадоў і мястэчак, дзе збіраў ён свае падарожныя гісторыі, Нясвіж — найцудоўнейшы горад яго Радзімы.

  У чытачоў і гасцей бібліятэкі была магчымасці прайсціся жыццёвымі сцежкамі Барыса Вятлугіна. Гэтыя матэрыялы ў выглядзе прэзентацыі падрыхтавалі супрацоўнікі бібліятэкі Таццяна Байкаш, Наталля Кульчыцкая.

 Падчас сустрэчы Барыс Мікалаевіч  падзяліўся сваімі жыццёвымі парадамі з юнымі і сталымі ўдзельнікамі імпрэзы. Самыя галоўныя парады паэт сабраў у сваёй кнізе паэзіі і прозы “Путевые заметки”. Яго вершы ўвайшлі ў калектыўныя зборнікі паэзіі “Букет Валошак”, “Паспець на размову”, “З палітры маёй Радзімы”. А таму гаварыў паэт, у асноўным,  вершамі. Парады,  узятыя з твораў юбіляра, агучылі і сябры раённага літаратурна-музычнага аб’яднання “Валошкі”, у склад якога Барыс Мікалаевіч увайшоў з першага дня,  а менавіта з 6 кастрычніка 2006 года.

Творы нашага земляка ўвайшлі і ў калектыўныя зборнікі абласнога народнага калектыву аўтарскай песні і паэзіі “Жывіца”. Аб значнасці літаратурнай дзейнасці юбіляра выказалася кіраўнік гэтага аб’яднання, член Саюза пісьменнікаў Рэспублікі Беларусь, член Саюза пісьменнікаў Саюзнай дзяржавы, член Беларускага саюза музычных дзеячаў Ірына Аляксандраўна Карнаухава.

 З 2005 года Барыс Мікалаевіч з’яўляецца ўдзельнікам хору ветэранаў “Аптымісты”. І ён не толькі цудоўны паэт, але і аўтар музыкі на свае  вершы, вершы іншых паэтаў, у тым ліку і  жывічан. Песня “Славянская жемчужина” на словы жывічаніна Мікалая Марына, музыку да якой напісаў Барыс Мікалаевіч, ў выкананні юбіляра і  хору пад кіраўніцтвам Ірыны Латушка стала цудоўным дапаўненнем да ўсяго сказанага ў вершах і прозе.

Вучні 1 “Б” класа СШ № 1 г. Нясвіжа пад кіраўніцтвам сваёй настаўніцы Святланы Аляксееўны Шчэрба падрыхтавалі вершы Барыса Вятлугіна, калісьці падораныя ім сваім дзецям, а зараз і ўсім, хто мае магчымасць дакрануцца да творчасці паэта.  

Калі ў раённай газеце “Нясвіжскія навіны” юбіляр ужо шмат гадоў лічыцца няштатным карэспандэнтам, то ў Нясвіжскай цэнтральнай раённай бібліятэцы імя Паўлюка Пранузы — амаль штатным супрацоўнікам. З гэтай нагоды дырэктар бібліятэкі Аксана Уладзіміраўна Рыжыкава ўручыла Барысу Мікалаевічу Падзяку за шматгадовае супрацоўніцтва з нашай установай.

 Удзельнік праекта “Парады з вуснаў несвіжан” Барыс Вятлугін падзяліўся і сваёй марай — каб на наступны год на паліцах бібліятэк раёна з’явілася яго новая кніга паэзіі і прозы. А сярод мноства парадаў, якія прагучалі з яго вуснаў падчас імпрэзы, галоўнай была наступная:

“Шануйце Радзіму, беражыце сям’ю і бузьце здаровымі”.

Працягам сустрэчы стаў круглы стол для паэтаў Нясвіжчыны “Паэзія сучаснасці”, які правяла член Саюза пісьменнікаў Рэспублікі Беларусь Ірына Аляксандраўна Карнаухава.

Валянціна Шчарбакова,

кіраўнік раённага літаратурна-музычнага аб’яднання “Валошкі”

  Несвижская центральная районная библиотека им.П.Пронузо